Стадион од дрво во Фукушима: Традиција и технологија во служба на циркуларна градба

Во јапонската префектура Фукушима најавена е изградбата на првиот кружен дрвен стадион во земјата, со капацитет од 5.000 места. Овој иновативен проект е заеднички осмислен од фудбалскиот клуб Fukushima United FC и архитектонскиот стартап VUILD, а неговата изградба има за цел да го комбинира современиот дизајн со одржливиот развој и локалната традиција.

Локацијата на стадионот носи силна симболика – ќе биде изграден во подрачје кое сè уште ги носи последиците од катастрофалниот земјотрес и нуклеарната несреќа од 2011 година. Архитектите и инвеститорите сакаат објектот да биде препознаена како симбол на закрепнување, односно израз на отпорност и заедништво.

Циркуларен проект во знакот на одржливост

За разлика од вообичаените спортски арени со доминантна главна трибина, новиот стадион ќе биде поделен на четири волумени, секој со сопствен влез, со пресеци што одговараат на двокатни куќи.

Главниот градежен материјал ќе биде ламинирано дрво од локалните шуми, а сите елементи се проектирани така што можат да се расклопат и повторно да се употребат – одразувајќи ги принципите на кружната економија.

Инспирација од јапонската традиција

Проектот се потпира на концептот „Shikinen Sengu“, ритуалното обновување на светилиштата. Тој дух се пренесува во три основни циклуси што го дефинираат стадионот: сировини, заедница и занаетчиство.

VUILD планира организирање програма за пошумување, работилници за обработка на дрво и заедничко учество во изградбата, за вештините и ресурсите да растат заедно со стадионот.

Кров како омаж на локалната архитектура

Носечката конструкција на кровот користи параболични школки формирани од тенки дрвени носачи, кои овозможуваат големи распони без дополнителни потпори. На нив се поставени дрвени елементи во форма на синџири, формирајќи триаголен кров.

Обликот е омаж на традиционалните куќи со стрмни сламени кровови од историската населба Ōuchi-juku, со што се воспоставува визуелна врска со архитектонското наследство на регионот.

Интересно е што самите кровни конструкции ќе бидат подигнати во духот на старите јапонски церемонијални ритуали, со колективно учество на граѓаните – правејќи ја изградбата дел од заедничка прослава, а не само технички процес.

Енергетска ефикасност од климата на регионот

За да се прилагоди на локалната клима, стадионот користи стратегии за пасивно ладење и греење. Обликот на кровот обезбедува заштита од летната топлина и зимскиот студ, додека фасадите се проектирани да го пропуштаат летниот ветер и да ја задржат топлината во текот на зимата.

Дождовницата ќе се собира и користи во објектот, а снегот ќе се складира во зима и ќе се користи за ладење во потоплите месеци. Преку овие методи, стадионот ќе ја намали зависноста од механичките системи и ќе го користи природниот ритам на животната средина за енергетска рамнотежа.

Покрај сето тоа, објектот ќе произведува сопствена обновлива енергија и ќе ја складира, со цел да ги исполни строгите барања на „Living Building Challenge“ – еден од најстрогите меѓународни стандарди за еколошка градба.