Кампања на Lacoste Рlay with Icons: Новак, Niney и Yibo

Откако со минатогодишната кампања Play Big оставија впечатлив белег на модната сцена (буквално — на Кинескиот ѕид), Новак Ѓоковиќ, Pierre Niney и Wang Yibo повторно се во центарот на вниманието на брендот Lacoste, во нова, уште пософистицирана кампања наречена Play with Icons.

Фотографиите се потпишани од ценетиот Тајлер Мичел, кој спојува скулпторски минимализам и надреалистички мотиви за да ја истакне иконографијата на брендот Lacoste во модерен, уметнички клуч.

Облечен во off-white, Ѓоковиќ се појавува како тениски бог на современата ера – крунисан со златна мрежа, во симболичен кадар што ја прикажува неговата доминација на теренот и надвор од него. Неговото присуство не само што укажува на спортско педигре, туку и го зацврстува статусот на Lacoste во културата на перформанси и елеганција.

Актерот Pierre Niney си игра со иронија и симболика, позициониран на софа во форма на крокодил – суптилен омаж на логото на брендот. Во класичниот Lacoste зелен тон, неговиот кадар изгледа како од модерен уметнички филм, каде што хуморот и естетиката не се исклучуваат, туку се надополнуваат.

Кинеската суперѕвезда Wang Yibo е опкружен со букети направени од превиткани Lacoste поло маички – сина на сина, во духовита визуелна игра што алудира на неговото глобално влијание и современост на ова култно парче.

За разлика од театралноста на кампањата Play Big од минатата сезона, Play with Icons носи промислена сценска композиција. Секој кадар е внимателно режиран, богат со значење и визуелен хумор. Фокусот сега е на деталот, симболот и играта на пропорции, додека препознатливата Lacoste естетика останува недопрена – само порафинирана.