120.000 евра се потрошени за обнова на Дом на млади во Штип

Во тек се градежните зафати за реконструкција на Домот на млади во Штип. Активностите моментално се врзани за внатрешниот и надворешниот (фасаден) дел, а се очекува на крајот да биде обновен и дел од кровната конструкција. Во внатрешниот дел, заменети се прозорците, најголемата просторија која служеше за концертни настапи и различни перформанси веќе е со нови ѕидови, а се работи и на обнова на одводната мрежа и реконструкција на тоалетите.
Според градоначалникот на Штип, Илчо Захариев, до сега за обнова на Дом на млади се потрошени околу 120.000 евра, и во рамките на предвидената сума ќе бидат завршени сите градежни зафати.

Претходно Домот на млади доби асфалтиран влез и паркинг простор до објектот. Ова е прва поголема инвестиција во Домот на млади, со кој ќе се овозможи заживување и негово адаптирање за младински активности, со оглед на децениското пропаѓање и неодржување.