Во Охрид започна летната школа на Енергетската заедница

Минатиот викенд во Конгресниот центар во Охрид, започна со работа  втората летна школа на Енергетската Заедница (Energy Community -EnC). Школата ќе трае до втори септември, a  учествуваат 40 најуспешни учесници од 25 различни земји од Југоисточна Европа и од Европската Унија, како и  експерти – предавачи за енергетика и климатски промени. Целта на Летната школа, е поддршка на енергетската транзиција кон нискојаглеродни технологии и интергација на земјите од Југоисточна Европа со зајакнување на учеството на младите во креирање на одржливи развојни политики.

Летната школа ја организира Секретаријатот на Енергетската заедница во соработка со Вишеградскиот фонд, Факултетот за електротехника и информациски технологии во Скопје и Отворениот регионален фонд за Југоисточна Европа – Енергетска ефикасност (ORF-EE), спроведуван од Германската организација Deutsche Gesellschaft fur lnternationale Zusammenarbeit (GIZ) (Германско друштво за интернационална соработка). Првата летна школа на Енергетската Заедница (EnC) се одржа во Албанија во 2016 година.

На самиот почеток од оваа летна школа, на присутните се обратија: д-р Кочо Анѓушев -вицепремиер за економски политики, проф.д-р Димитар Ташковски – декан на ФЕИТ, Дирк Бушле – заменик на директорот на Секретаријатот на Енергетската заедница, како и Јоаким Гаубе – секторски раководител на Отворениот Регионален Фонд за Југоисточна Европа за енергетска ефикасност на ГИЗ.