Виена: 2015 – година на пешачењето

Градот Виена ја прогласи 2015-та за „Година на пешачењето“. Оваа тема подразбира бројни активности со кои се настојува да се зголеми бројот на пешаци во градот, да се укаже на позитивното влијание врз здравјето и околината, а пешачењето како наједноставен вид на движење да стане попопуларно.

Денес, 39% од населението во Виена користи јавен превоз, 6% велосипед, а 27% се пешаци. Кон крајот на минатата година, Собранието на градот усвои неколку стратешки документи чии основни цели се промовирање на сигурност во сообраќајот. На прво место, тоа е концептот за сигурност на пешаците во сообраќајот, односно “Vision Zero”, што како крајна цел значи нула мртви пешаци во сообраќајот. Со цел да се стимулира пешачењето, Градот се обврзува да направи нови пешачки патеки и поатрактивни пешачки зони со зеленило.

Наскоро ќе бидат достапни и апликации за броење на чекорите и планирање на рутите. Планирани се и повеќе манифестации како на пример: „Мобилни кафулиња“ за запознавање на населбите, потоа “Street Festival” и секако најголемата меѓународна конференција за пешачењето “Walk21” која во октомври се одржува во Виена.