УНИЦЕФ: 300 милиони деца во светот вдишуваат загаден воздух

„Речиси 300 милиони деца во светот живеат на места каде воздухот е толку загаден што кај нив може да прдизвика сериозни здравствени проблеми. Секое седмо дете во светот вдишува воздух кој е најмалку шест пати позагаден од максимално дозволените вредности пропишани од Светската здравствена организација (СЗО)“, велат од УНИЦЕФ и истакнуваат дека загадениот воздух е главен фактор за детскиот морталитет.

Извештајот на УНИЦЕФ е објавен во очи на најновиот самит на ОН за климатски промени во Маракеш, Мароко. Агенцијата на ОН која ги промовира правата на децата, бара од светските лидери преземање на итни мерки за намалување на загадувањето на воздухот во своите земји. Тврдењата за опасното ниво на загадување, УНИЦЕФ ги темели на сателитски снимки. Воздухот во урбаните средини највеќе се загадува од издувните гасови на автомобилите, согорување на фосилни горива, прашина и др.