Светлосна инсталација „Поларна Светлина“ во Париз

„Поларна светлина“ е светлосна инсталација на уметницата Александра Стратимировиќ поставена во паркот на Кралската палата, по повод официјалната посета на шведскиот кралски пар во Париз. Инсталацијата свечено ја отвори Кралицата на Шведска на 2 декември.

Инсталацијата под оригинално име “Northern lights” за Jardin de Lumiere настанува како иницијатива на IKEA France и амбасадата на Шведска во Париз, во соработка со Le centre  des Monuments Nationaux.

Александра Стратимировиќ е родена во Белград каде дипломира на Факултетот за применети уметности и дизајн. Од деведесеттите години го продолжува образованието во Стокхолм каде моментално живее и работи. Одлика на нејзината уметност е работа со светлина, креирајќи голем број скулптури и инсталации во јавниот простор.

Нејзина инспирација е одржливата иднина на компанијата IKEA, па затоа се обидува и физички да го претстави тој концепт, употребувајќи ги нивните производи кои се базираат на најсовремена LED технологија, приспособени за широка употреба.

„Ова дело ги поврзува шведската природа и препознатливиот амбиент на историскиот Париз, како симбол на убавината на културната интеракција и пријателствата“, ќе каже Александра.