Порта3 – градежништво, архитектура и екологија Порта3 – градежништво, архитектура и екологија
Од 28 февруари до 4 март на Скопски саем, се одржа 14. издание на Меѓународниот саем на градежништво, градежни материјали и градежна механизација и седмиот по ред RealExpo – Меѓународен саем на недвижности.
На Саемот на градежништво во трите саемски хали се нудеа и продаваа градежни производи и услуги за работа, одржување, модернизирање, реновирање и опремување објекти и имоти.
За жал, можеме да констатираме дека ниту по бројноста на излагачите, ниту по квалитетот на саемската понуда, па ниту по посетеноста, тоа не беше саем што ќе остане во паметење. Напротив. Далеку од некогашниот саем „Технома“, па и од претходните изданија, каде што градежништвото било примарно застапено, со голем број реномирани фирми од странство и што е уште поважно, бројот на заинтересираните и љубопитни посетители беше на многу високо ниво. На овогодишниот саем, посетеноста беше главно фокусирана во првата хала, каде што се нудеа недвижности. А тоа сепак не треба да е примарно за некогаш реномираниот Саем.
Од останатите настани одржани на саемот, како квалитетни би ги истакнале презентацијата на Адинг – Скопје, како и интересната трибина на Асоцијацијата на архитекти на Македонија во однос на актуелните состојби на македонската архитектура.
За крај, ако Скопски саем сака да го подигне нивото на Саемот за градежништво, ќе мора нешто драстично да менува во организациска и креативна смисла на зборот. Ова што го имавме годинава не беше доволно и не беше на потребното ниво.
