„Приказни за проектирањето“ од Кристоф Фелгер на Архитектонскиот факултет во Скопје

Минатата вечер амфитеатарот на Архитектонскиот факултет во Скопје беше претесен да ги прими сите студенти и архитекти заинтересирани за предавањето „Stories about Designing“. Повеќе од 300 гости дојдоа во просториите на факултетот да го проследат излагањето на архитектот Кристоф Фелгер, партнер и дизајн директор на престижното архитектонско биро David Chipperfield Architects од Берлин.

Во период од час и половина гостинот ја воведе публиката во светот на ова влијателно архитектонско биро. Во првиот дел од предавањето кусо ја опиша историјата на бирото, нивниот естетски и проектантски дискурс како и самата структура на работа на бирото.

Веќе во вториот дел предавачот се осврна на комплексноста на процесот на комплетирање на едно архитектонско дело. Односно, преку нивното искуство со проектот за повеќенаменскиот објект на козметичката корпорација Amore Pacific во Сеул, Кореја, Кристоф Фелгер ни откри дел од предизвиците на архитектонската професија.

Архитектонските приказни презентирани од Кристоф Фелгер покажаа пред присутните вистинска страст, посветеност и убавина на она што значи да се биде инженер, уметник, и пред се архитект. David Chiperfielld Architects совршено влегуваат во овие атрибути.