Отворено Биеналето на македонската архитектура – БИМАС 2014

Синоќа во Музејот на град Скопје беше отворено 17. Биенале на македонската архитектура – БИМАС 2014. Станува збор за презентација на македонската архитектура во изминатите две години. На изложбата се претставени 84 паноа, видеа, макети, од веќе афирмирани, но и млади македонски архитекти.

Претседателката на Асоцијацијата на архитекти од Македонија, која е организатор на Биеналето, Сања Раѓеновиќ – Јовановиќ, изјави дека БИМАС се отвора во време кога е игнорирана македонската архитектонска фела, кога се создаваат два паралелни света, две страни на еден град, кога домашната архитектура е злоупотребена. Таа смета дека треба да се развие здрава дебата, за да се види до каде е архитектурата, да се лоцираат грешките и конечно архитектурата да го добие своето заслужено место.

Од вкупно пријавените 112 труда селекторот на Биеналето, Биљана Филиповска – Тодорчевска, одбра 84. Таа вели дека за пофалба е што има добар процент на квалитетно архитектонско творештво, било од веќе докажани професионалци, но и од млади архитекти кои ќе застанат во одбрана на архитектурата, наспроти нејзината комерцијализација. Што, според неа, создава голем впечаток.

Во рамките на манифестацијата, покрај презентацијата на творештвото на архитектите, ќе има предавања, дебати и размена на мислења на луѓето од фелата, на кои ќе учествуваат домашни и странски архитекти. Исто така во четврток, 9 мај, ќе се отвори изложбата на младите архитекти – БИСТА.

На 19 мај, кога ќе се одржи свеченото затворање на Биеналето, ќе се доделат и признанијата, Гран при и специјални награди, за кои ќе одлучува жири-комисија со која претседава архитектот Мишко Ралев.