Легализирани 25 отсто од дивоградбите во Центар Жупа

Во општина Центар Жупа до определениот рок за легализација на дивоградби барања доставиле 1.578 лица.

Од нив, досега се решени само околу 25 отсто, а главна причина,според градоначалникот Ариан Ибраим, се нерешените имотно правни работи.

– Од вкупно поднесените 1.578 барања за легализација на диво изградени функционални објекти, легализирани се 375 или околу 25 отсто. На нивните сопственици веќе им се издадени решенија и имотот им е воведен во катастар. Многу од барањата се во процес на решавање, но главната пречка се нерешените имотно правни работи, – изјави Ибраим.

Според него, благодарение на поволноста што владата лани ја одобри за социјално ранливите групи, за кои подготовката на елаборат е бесплатна, процесот на решавање на барањата добил забрзан тек. Само лани, додава тој, легализирани се 110 дивоградби.

Што се однесува до подносителите на барања кои живеат и работат во странство, нагласи градоначалникот, кај нив речиси и не постои заинтересираност.

Секторот за урбанизам во оваа општина максимално е ангажиран да им излезе во пресрет на сите заинтересирани, со цел овој процес успешно да заврши.