Изум на Словенци: работна маса со безжично полнење на мобилен телефон

Љубљанското студио Desnahemisfera за фирмата Donar дизајнираше работна маса која благодарение на QI стандардите го полни телефонот на корисникот со самото оставање на нејзината површина.

Работната плоча е направена од Kerrocka во кој е интегриран полнач AirCharge со LED светла. Кога телефонот ќе се остави на означеното кружно поле, LED светлата ќе се запалат во црвена боја кога телефонот се полни, зелена кога батеријата е наполнета, односно бела кога е во stand-by режим. Треба само телефонот да се спушти на означеното кружно поле, па батеријата ќе почне да се полни.

Но, секој телефон не би можел да се наполни на овој начин, мобилниот телефон треба да поддржува QI стандарди. Тоа се главно понови модели како Samsung Galaxy 4 или 5, iPhone 5S или 6, Nokia Lumia 920, 930, 1020, 1520.

Како контраст на работната плоча тука е делот со фиоките, направени од дрвени греди кои се отвораат по пат на механизам со допир.