Изложба „Париз те сакам“ во Чифте амам

Во Националната галерија на Македонија, објект Чифте амам, денес во 13 часот ќе се отвори изложбата „Париз, те сакам“.

Изложбата „Париз те сакам“ во репрезентативниот простор на Чифте амам е организирана по повод Светскиот ден на франкофонијата. На изложбата се претставени делата на 41 македонски уметник, кои со поддршка на Министерството за култура на РМ во текот на изминатите години имаа можност да остварат двомесечен студиски престој во „Меѓународниот град на уметностите“ во Париз, светскиот центар на уметноста.

Министерството за култура на Република Македонија, почнувајќи од 2002 година досега, овозможи претставување на повеќе од 100 уметници кои остварија размена на искуства со уметниците од Франција, како и од другите држави, имаа можност за контакти и посети на институциите од областа на културата во Париз, како и договарање на соработка со соодветни галериии.

Република Македонија од 2006 година е официјално членка на меѓународната организација на франкофонијата каде преку бројни активности доследно ги промовира и афирмира вредностите на франкофонските земји и дава свој придонес во остварувањето и развивањето на дијалогот меѓу културите.