Историја на Светските изложби (World Expos) – „Големата изложба“ од 1851

Светските изложби отсекогаш биле важни за архитектонската иновација и израз. Многу од најполпуларните монументални објекти биле проектирани и изградени токму за оваа манифестација. Низ историјата Светската изложба им нуди на архитектите да ги презентираат своите радикални идеи, и служи како своевидна лабораторија за тестирање не само на иновациите во дизајнот, туку и на технологиите на изградба. Во овој и наредните написи на истава тема, ќе презентираме по некој значаен објект кој оставил белег не само на Светските изложби туку многу пошироко.

Првата Светска изложба е онаа одржана во Лондон во 1851, позната како „Големата изложба“. Претставени се околу 100.000 проекти, но во центарот на вниманието била познатата „Кристална палата“( Crystal Palace). Проектиран од страна на Сер Џозеф Пакстон, и изграден главно од стакло и челик, овој објект демонстрирал неверојатни инженерски перформанси и претставувал најголема структура од стакло воопшто видена во градежништвото во тоа време.

И покрај тоа што во 1936 година била уништена во пожар, оваа зграда останува предвесник на развојот на техниките на градење со користење на големи стаклени површини карактеристични за архитектурата на дваесеттиот век.