„ИКЕА“ планира да воведе еколошка амбалажа произведена од печурки

Гигантот во индустријата за производство на мебел „ИКЕА“, ја најави можноста за воведување нов вид еколошко пакување на своите производи и комплетно исфрлање на традиционалниот полистирен. Новиот материјал ќе се произведува од коренот на печурките и носи со себе многу предности, како што се огноотпорност, конкурентна цена, лесно обликување и дизајнирање и сл. Најголемиот бенефит, секако, е фактот што не се добива со деривација од нафтата или храната, со што влијанието врз животната средина е минимално. Овој проект компанијата го развива во соработка со американската „Ecovative“.

Мултинационалниот синџир „ИКЕА“  има над 300 продавници ширум светот и е една од најбрзорастечките компании во последнава деценија. Нивната одлука да го заменат полистиренот со одржлива еколошка варијанта, може да помогне во поставувањето нови стандарди за индустријата во врска со одржливото пакување.