Хрватска и Србија заеднички инсталирале соларни електрани на 30 јавни објекти

Во склоп на проект за прекугранична соработка, финансиран од ЕУ, поставени се фотоволтаични електрани на вкупно 30 јавни објекти во Суботица, Србија, како и во три помали општини во Хрватска. Освен тоа, изградени се и паметни автобуски постојки и унапредено е јавното осветлување.

Инвестициите се реализрани преку проектот „Енергетски ефикасни заедници“ – ENGAGE, вреден над 2 милиони евра. Проектот е финансиран со поддршка на ЕУ, а стручна поддршка обезбедена е од страна на Националната алијанса за локален економски развој (NALED) од Србија. Со овој проект, локалните самоуправи од Србија и Хрватска, покажале како прекуграничната соработка може да донесе конкретни и мерливи бенефити. Вкупниот капацитет на фотоволтаични електрани во склоп на проектот изнесува околу 0,8 MW, од кои околу 0,5 MW во Суботица, и околу 0,3 MW во хрватските општини. Град Суботица најавува и формирање на заедница за обновлива енергија, со што се отвора простор за граѓаните, институциите и локалните претпријатија заеднички да произведуваат и користат енергија од обновливи извори.