Енергетски независна куќа на вода

Животот на вода на многумина не им изгледа примамливо. Но, можеби ќе го сменат мислењето кога ќе го погледнат концептот на мали енергетски независни куќи кои лебдат на површината на водата и кои се направени од рециклирани материјали.

Според проект на италијанскиот архитект Џанкарло Зема, компанијата “EcoFloLife” ја разви енергетски независната куќа “WaterNest 100” (или во превод „Водено гнездо“).

Рециклираните материјали за изградба на куќата се користени на тој начин што овозможуваат повторно рециклирање на крајот од животниот век на куќата. Куќата има површина од 93 метри квадратни, пречник од околу 12 метри и височина од 4 метри. Направена е од ламинирано рециклирано дрво, а делот што е во вода е од рециклиран алуминиум. Покривот е прекриен со фотоволтаични модули чија вкупна површина е 60 метри квадратни, со моќност од 4 kW.

Објектот е направен така што овозможува природна циркулација на воздухот, при што се намалува потребната енергија за ладење. Иако првобитно е замислена како резиденцијален објект, оваа куќа може лесно да се претвори во деловен простор. Може да се постави на која било мирна водена површина.