Дваесет пронајдоци кои го сменија светот

Од примитивните алатки пред илјадници години, па до модерните достигнувања на дигиталната ера, бројни иновации сериозно го менувале текот на историјата и го преобликувале животот на човекот. Во продолжение Ви ги претставуваме 20. најзначајни пронајдоци во историјата на човештвото, според сајтот „Interesting engineering“.

Тркало

Според архелошките истражувања, најстарото пронајдено тркало е од 3500 година пр.н.е. од Месопотамија. Токму усовршувањето на дизајнот на тркалото создава услови за развој и на индустриската револуција многу векови подоцна.

Автомобил

Иако Карл Бенц стои зад изумот на модерниот автомобил во 1886 година, најзаслужен за производството на автомобили е Хенри Форд, кој во почетокот на 20 век го открива сериското производство кое подоцна станува општоприфатен стандард. Останатото е историја.

Рачни алати

Првите примитивни рачни алати датираат од пред 2,6 милиони години во Етиопија. Со развојот на машините во последните векови рачните алати се усовршени до перфекција. Сепак, во основа многу работи во суштина се исти.

Електрична светилка

Идејата за светилката датира од пред повеќе од 150 години. Едисон и Сван ја патентираат првата светилка во 1879 и 1880 година. Во средината на 80-тите години од минатиот век се појавува првата верзија на штедлива светилка CFL. Но, релативно брзо се воочуваат и првите негативни карактеристики на овие светилки. Денес, LED осветлувањето  нуди најдобри можности во поглед на енергетската ефикасност.

Телеграф и Морзеова азбука

Телеграфот е отктиен во периодот помеѓу 1830 и 1840 година од страна на Samuel Morse, со цел пренесување пораки односно комуникација на далечина преку посебен систем од знаци (точки и цртички) кои ја сочинуваат Морзеовата азбука.

Компас

Направата без која не може да се замисли навигацијата е измислена во 1050 година пр.н.е. од страна на Кинезите. Но, со откривањето на електромагнетот во 1825 година започнува ерата на модерните компаси.

Авион

Браќата Рајт во 1903 година го измислиле првиот авион и ги поставиле основите на аеронаутичкото инженерство. Иако денес оваа индустрија има исклучително брз развој, основите се исти како во првиот концепт на браќата Рајт.

Парна машина

Во 1781 година Џејмс Ват го патентира овој пронајдок и го овозможува веројатно најголемиот прогрес во индустриската револуција.

Печатарска преса

Пронајдена во 1440 година во Мајнц, Германија, од страна на Гутенберг, оваа преса овозможува за првпат создавање копии од документи и книги без макотрпното и бавно  препишување кое било дотогаш единствениот начин. До 1600 година багодарение на овој пронајдок испечатени се 200 милиони книги.

Банкноти

Во Европа се воведени во 13 век, наместо дотогашната размена со скапоцени метали и ковани метални пари. Се смета дека банкнотите за првпат се воведени во Кина во 118 година пр.н.е., за време на Династијата Хан. Секако, банкнотите ја менуваат глобалната економија и претставуваат витален чекор кон новиот монетарен систем.

Челик

Додека во старите времиња се користеле железо, бронза и сл., челикот овозможува забрзување на индустриската револуција. Првото производство на челик датира од пред 4000 година, а со откривањето на Бесемеровиот процес започнува модерното производство на челик. Денес без челикот не може да се замисли ниту една индустриска гранка.

Транзистор

Првиот практичен модел е измислен во 1947 година, а тројцата научници зад овој пронајдок се наградени со Нобелова награда за физика во 1956 година. Транзисторот станува фундаментална компонента во електронските апарати.

Антибиотици

Антибиотиците спасиле милиони животи кои дотогаш умирале од последиците од опасните бактерии. Иако Кох и Патер уште во 1877 година го истражувале и го објасниле овој феномен на антибиотска терапија, дури во 1928 г. Александар Флеминг го открил пеницилинот, кој станува широкораспространет во текот на целиот дваесетти век.

Компјутер

Машинскиот инженер Charles Babbage се смета за татко на првиот механички компјутер уште во 19 век. Но, тој не е единствениот кому му се припишуваат заслугите за ова откритие. Неговиот првичен концепт е доработен од страна на Алан Туринг во еден негов труд во 1936 година.

Фрижидер

James Harrison ја направил првата машина за ладење користејќи ситем испарување – компресија. Сепак, првиот фрижидер кој сериски се произведувал бил оној од 1927 г. од General Electric под името Monitor-Top.

Фотоапарат

Првиот фотоапарат со дрвено гломазно куќиште е откриен во 1826 година, а од 1975 г. започнува ерата на дигиталните фотоапарати. Новата револуција стигнува со нивното интегрирање со мобилните телефони.

Електронска пошта

Првите позначајни почетоци на имејл ерата се забележани во 60-тите години од минатиот век, за потоа да ја добие формата каква што ја познаваме денес, односно доставување на пошта преку еден клик.

Интернет

Интернетот започнува да се развива уште од 50-тите години на минатиот век во САД, паралелно со развојот на компјутерската технологија. Веќе до средината на деведесеттите, постигнува неверојатно глобално влијание во сите сфери. Во 1991 година, Tim Berners-Lee го воведува www ( World Wide Web).

Кредитни картички

Идејата за кредитните картички датира од 1950 година од Ралф Шнајдер и Френк МекНамара, основачите на Дајнерс Клаб. За кратко време оваа идеја станува стандард.

Телефон и мобилен телефон

Од изумот на телефонот во 1876 година од страна на Александар Бел, поминале речиси 100 години, до 1973 г. кога двајца инженери на „Моторола“ го претставиле првиот мобилен телефон. Со развојот на потребната инфраструктура од 80-тите години, комуникацијата нема веќе лимит.