Бегство од енергетскиот проект на столетието?

Пред само пет години, проектот Desertec беше славен како енергетски проект на столетието. Идејата на моќните енергетски компании да произведуваат електрична енергија за Европа од сонцето во Африка – онаму каде што потенцијалот е најголем, беше навистина револуционерна. Но денес, сè повеќе компании му вртат грб на овој проект.

Иако потенцијалот од сончевото зрачење е огромен во овој дел од светот, а северноафриканските земји се исклучително заинтересирани за странски инвестиции, се чини дека нивната политичка нестабилност се наметна како еден од клучните фактори. По Арапската пролет инвеститорите и банките се соочија со нови ризици, а се работи за одлуки тешки милијарди евра. Од минатата недела и германскиот гигант E.ON најави дека се откажува од проектот.

Проектот Desertec вреден околу 400 милијарди евра, имаше амбициозна цел до 2050 година да обезбедува сериозни количини енергија за Европа, и со тоа да го ослободи стариот континент од фосилните горива.