Започна со работа првото комерцијално складиште на CO2

Компанијата Northern Lights ги складираше првите количини CO₂ под дното на Северното море во Норвешка. Фирмата тврди дека на тој начин станала прва која нуди комерцијални услуги за зафаќање и складирање на јаглерод. Northern Lights е во сопственост на нафтено – гасните гиганти  Equinor, TotalEnergies и Shell. Првите количини на CO₂ се транспортирани преку цевковод од 100 km и складирани се во резервоарот Aurora, на длабочина од 2.600 метри под дното на норвешкото Северно море. Испораките на CO₂ од Данска и Холандија ќе стартуваат во 2026 година.

Кoмпанијата ќе транспортира и ќе складира CO₂ за две норвешки фирми: цементарницата  Heidelberg Materials во Бревик и постројката за преработка на отпад на компанијата Hafslund Celsio во Осло. Освен тоа, потпишани се комерцијални договори со фирмите Yara од Холандија, Ørsted од Данска и  Stockholm Exergi во Шведска. Првата фаза на инвестицијата која ја развива Northern Lights е дел од владиниот проект за зафаќање и складирање на јаглерод диоксид (CCS) под името Longship. Како што тврди норвешката влада, тоа е првиот комплетен вредносен синџир во Европа за зафаќање, транспорт и складирање на индустриски емисии на CO₂ во Европа и најголема климатска иницијатива во историјата на норвешката индустрија. Longship вклучува и владина поддршка за развој на инфраструктурата на компанијата Northern Lights.