Загреб воведува наплата на комуналниот отпад според количината

Во Загреб се воведува нов систем на наплата на комуналниот отпад, осносно според количината. Целта е да се намали количината на отпад кој завршува на одлагалиштата. Граѓаните ќе плаќаат фиксен дел еднаков за секое домаќинство, и варијабилен дел преку купување на вреќички во кои ќе го одлагаат отпадот во контејнерите. На тој начин, оние кои повеќе ќе го селектираат отпадот ќе плаќаат помалку. Актуелниот предлог е вреќичка од 20 литри да чини 4 куни (0,53 евра), а од 40 литри да чини 8 куни (1,06 евра) со вклучен ДДВ. Во моментот оваа одлука е пуштена на јавна расправа, а планирано е да стапи на сила од 1-ви јули 2022 година. Сепак, одлуката е комплексна за имплементација, со оглед дека станбените згради имаат контејнери со слободен пристап, кои сега ќе треба да се држат под клуч, а се поставува и прашањето на контролата и хигиената. Но, и покрај споменатите бариери, градските власти истакнуваат дека нема алтернатива.