Во АДИНГ се одржа настанот БЕТОН.Ск

Во рамки на серијата настани насловена како „Скопско асеизмичко лето“ кои се посветени на одбележување на 60. годишнината од скопскиот земјотрес, Градежниот факултет УКИМ во Скопје, АДИНГ АД Скопје и СГГУГС „Здравко Цветковски“ во понеделникот во дворот на АДИНГ го одржаа настанот БЕТОН.Ск.

Претседател на УО и генерален директор на АДИНГ, Петровски Зоран кратко ги поздрави пристуните и им посака добредојде.

Директорката на  СГГУГС Здраво Цветковски, Атина Томовска го поздрави настанот каде училиштето учествуваше со по еден ученик во секој од петте тимови.

Свое обраќање имаше и Деканот на Градежен Факултет – Скопје, Проф. д-р Горан Марковски кој е носител на идејата за овој настан и потенцираше дека настанот треба да ја подигне свеста за неопходноста од квалитетно градежништво, што подразбира изградба на квалитетни и отпорни конструкции, што се единствен наш спасител и единствено решение или единствен наш одговор на катастрофалните земјотреси, односно катастрофалните други природни појави, кои се сѐ позачестени денес.

Натпреварот траеше 40-тина минути, а пет тима составени од тројца учесници подготвија бетонски мешавини и наполнија по три калапи за вградување на бетон. Јакоста на притисок ќе се испита во лабораториите на Адинг, симболично во 05.17 часот на 26.јули.

На учесниците во натпреварот им беа доделени парични награди за учество, а победниците кои ќе бидат прогласени на 26.јули ќе бидат дополнително наградени.