Трендови во кујната за 2015 година

Кујната не претставува само место за приготвување и консумирање на храна. Во поново време таа се трансформира и го зазема централното место во домот, кое служи за собирање на семејството, пријателите и гостите.

Деновиве во нашиот главен град е актуелен саемот за мебел, па анологно на тоа да провериме што од мебел се нуди на саемите во големите европски градови.

На саемот за мебел во Келн, кој се одржа пред околу еден месец, беа донесени најновите трендови во уредувањето на ентериерите, па така беше претставен и новиот лик на кујната.

Кујните се технолошки поразвиени, било да се работи за кујнските елементи или за кујнските апарати. Во обликувана смисла и понатаму како главен и доминантен елемент се јавува шанкот, кој претставува спој на работна површина и место за дружење.

Кујните се расчленети, се комбинираат отворени и затворени елементи, а комбинацијата на материјалите исто така е честа. Се комбинираат материјали како камен, дрво, метал, стакло, инокс, и нови материјали кои ги имитираат бакарот, бетонот и цементот.

Модерни се висечките елементи со врати од обоено стакло, што им даваат на кујните префинет изглед.

Неретко елеганцијата се комбинира и со индустриски или рустични детали. Често може да се сретнат шпорети, аспиратори, микробранови печки, рерни и сл. кои се со ретро дизајн и кои му даваат рустичен шмек на целиот ентериер.