Ново кое го почитува старото: Реконструкција на чешки замок од 14. век

Позициониран на рид, високо над долината на реката Морава на југоистокот на Чешка, замокот Хелфштин од 14. век претставува значајно културно наследство на оваа земја. За жал, во 2014. година, замокот морал да биде затворен поради сериозна опасност по безбедноста на посетителите, бидејќи ѕидовите се рушеле. Меѓутоа, тоа било прилика да се преземе темелна реконструкција на овој вреден историски споменик од периодот на ренесансата.

Едно од примарните барања на властите во регионот Оломоуц било реновирањето на замокот да вклучи и изградба на нов кров. Сепак, Институтот за национално наследство инсистирал на зачувување на градбата во трошна состојба, така што изградба на покривот била дозволена само делумно и можел да се постави висински само до нивото на ободните ѕидови.

Ренесанса на ренесансниот замок

Архитектонското биро „Atelier-r“, која го потпишува проектот, реконструкција на замокот ја започнала со пкористење на дрон кој забележал илјадници фотографии, благодарение на кои било можно да се спроведе 3Д мапирање на постојните sидови, како и планирани модификации.

Архитектите за ArchDaily истакнуваат дека сакале да направат повеќе од она што било проектна задача за реконструкцијата. Имено, тие настојувале да го дополнат изгледот на историската градба со елементи на модерна архитектура, кои ќе придонесат за практичната употреба на замокот, како и за дополнителна естетска привлечност.

Со цел посетителите подобро да се запознаат со овој историски објект, архитектите вметнале нови патеки за пешачење кои го поврзуваат приземјето со претходно недостапните повисоки нивоа на зградата. Дополнителните современи елементи јасно се препознатливи и може да се видат, а применети се три вида материјали, односно по еден за секое ниво. Така, кровот е изведен во комбинација стакло со челични греди, скалите и мостовите се направени од кортен челик, додека патеките на приземјето се направени од полиран бетон.

Стаклен кров

Рамен стаклен покрив е вметнат помеѓу старите ѕидови на замокот, ослонет на челични греди, така што овозможува чист поглед кон небото, што било примарна идеја при изборот на материјалот за покривот.

Архитектите се определиле за пескарено стакло од повеќе причини. Една од основните причини е затоа што е лесно за одржување, но исто така и погодно за ширење на природна светлина во внатрешноста. Единствениот дел од замокот кој е покриен со целосно транспарентно стакло е просторот на капелата, бидејќи во овој дел стаклениот покрив го симболизира небото.

Пасарели од кортен

Нивото на некогашниот кров сега стана нова рута за разгледување. За пешачките мостови било клучно да се избере материјал кој е безвременски, па затоа кортенот бил идеален избор. Кортен е специјална легура на железо која подлегнува на корозија, но „созрева“ на таков начин што совршено се вклопува со патинираните стари историски sидови. Интересно е што замокот Хелфштин е познат по својата традиција на правење железо, па затоа беше сосема логично да се избере овој материјал кој со текот на времето изгледа подобро.

Бетонски патеки

Во приземјето изведена е мрежа од патеки и простори за собирање од префабрикувани бетонски плочи. Просторот помеѓу полираните бетонски елементи и старите sидови на ниво на земјата е покриен со чакал.

Минато и иднина

„Нашиот концепт е заснован на почитување на историската градба и тежи со големи напори да се зачува автентичниот карактер на замокот. Замокот доби атрактивна рута за разгледување, која им овозможува на посетителите да дознаат повеќе за историјата на зградата и да уживаат во живописниот поглед од пасарелата на горното ниво на замокот, кое некогаш беше кров. Современата архитектура овдека не се натпреварува со историската зграда тука, туку создава кохезивна целина во која сите елементи, и стари и нови, одат рака под рака “, велат архитектите од „ Atelier-r“.