Куќа во Аргентина ослободена од вишок елементи

Escobar House е сместена во Haras Santa María de Escobar, затворен компаунд на 54 километри од Буенос Аирес. Куќата проектирана од аргентинскиот архитект Luciano Kruk се простира на површина од 282 квадратни метри и е направена за млад пар, клиенти кои сакале да апсолутна приватност.

Резултатот е структура која од предната страна е речиси целосно затворена, додека како контраст на тоа, задната страна е отворена и ужива во погледот на околниот терен за голф и зелената природа. Клиентите барале дневниот боравок и трпезаријата да бидат отворени во полупокриено проширување, директно поставено до базенот и материјалите да не бараат премногу одржување, па така куќата е направена од бетон и стакло.

„Намерата беше да се произведе архитектонска синтеза со организацијата на основата и единство кога станува збор за тотална морфологија“, вели за ArchDaily  архитектот.

Дизајнот е ослободен од сите елементи кои може да се сметаат за вишок. Luciano Kruk ги искористил висините кои варираат, едноставните линии и ефектите на природното светло во ентериерот за да креира силно чувство на длабочина и го задржи фокусот на природните убавини кои ја опкружуваат куќата.

Нејзиниот заден дел флуидно се поврзува со екстериерот, со терасата и дворот, кој продолжува во дневниот боравок и трпезаријата. А просторот е отворен кон базенот, чие поставување во рамки на платформата ветува величествени рефлектирачки ефекти, кои претставуваат визија на небото на мирната вода. Дневниот боравок е проектиран како најважен простор на овој дом и има повисоки плафони од останатите простории, тој е појдовна точка на проектот.

Останатите простории се со половина од висината и оваа артикулација овозможила органско поврзување на просториите и истовремено нивна независност.

Во куќата е овозможено и кружно движење преку кружниот и сервисен коридор поставен на предниот дел кој овозможува и приватност и сокриеност од погледи, а собите се орјентирани на спротивната страна, кон задната страна на парцелата. Овој коридор е речиси слеп, се отвара само со подолжни, хоризонтални процепи.

Носечката конструкција е организирана околу две паралелни греди, поставени долж целата куќа. За визуелно да се истакне хоризонталноста на волуменот, овие греди се повлечени, поставени на внатрешната страна на лушпата која се затвора.

Целта на архитектот била да проектира удобна куќа со помош на едноставни линии и обмислени простори, кои ќе воспостават близок дијалог со природното опкружување.