Издржи Скопје за нас, за тебе, за следните генерации Скопјани! (фото)

Акцијата за уредувањето на елементите околу Универзална сала е подарок за градот и граѓаните на Скопје по повод 75 годишнината од ослободувањето на Скопје од тимот на Урбаните Уметнички акции и Центарот за современи уметности.

Муралите кои осамнаа вчера на 13 Ноември, денот на ослободување на Скопје од фашистите, се дело на еминентните ликовни уметници од средната генерација, Александар Наумовски, Андреј Митевски и Љубиша Камењаров.

Учесниците на акцијата го честитаат и празникот на градот:

“Драго наше Скопје , ти си град кој преживеа невидени катастрофи, ти си град кој секојдневно крвари преку запалените контејнери и матниот загаден Вардар, но ти си и град на илјадници љубови, град на маџирмаалските голуби и чаирските фраери. Ти си единствениот град во кој сме дома.

Ти си Феникс, ти си нашиот град, ти си градот на солидарноста. Издржи Скопје за нас, за тебе, за следните генерации Скопјани!
Те сакаме и секогаш ќе бидеме тука за тебе и во добро и во зло! Среќен роденден, среќни 75 години слобода!“