Граѓаните излегоа на протестен марш за чист воздух

Голем број граѓани денес маршираа од Министерството за животна средина и просторно планирање, преку Собранието, па се до Владата и бараа чист воздух. Под слоганот „Марш за чист воздух# Зелена револуција“ иницијативата Fridays for future заедно со поддршката од неколку други граѓански здруженија маршираа низ центарот на Скопје и од Владата побараа исполнување на над 200 барања кои ги имаат. На маршот се приклучија и граѓански организации од останатите градови од Македонија.

Учесниците на маршот извикуваа „Здравјето пред профитот“, а во колоната можеа да се забележат транспаренти „Животот пластичен не е фантастичен“, „Јас знам, ќе го спасам својот дом“, „Нема воздух, нема мир“.

Активистите порачаа дека книгата со барања ќе им биде врачена на функционерите, за како што рекоа, да имаат што да читаат за викенд.

Од Владата пак велат дека имаат разбирање на загриженоста на луѓето од загаденоста на воздухот. Оттаму уверуваат дека внимателно ќе ги слушнат и прифатат сите аргументирани сугестии на граѓанските организации вклучени во „Марш за чист воздух“, при што упатија отворена покана за средба во Влада во понеделник, на 2 декември.