Делови од Нов Зеланд тонат: Нивото на морето се зголемува двојно побрзо од очекуваното

Нивото на морето во Нов Зеланд во некои делови се зголемува двојно побрзо од очекуваното, заканувајќи им се на двата најголеми града во земјата, покажуваат новите истражувања.

Податоците собрани долж брегот на земјата покажуваат дека некои области веќе тонат три до четири милиметри годишно. Проекциите се резултат на обемна петгодишна истражувачка програма наречена „NZ SeaRise“, пишува Beta / AP.

Програмата е финансирана од владата и имплементирана од десетици новозеландски и меѓународни научници. Според експертите, властите имаат помалку време од очекуваното да планираат како да се прилагодат на последиците од климатските промени, особено на преселувањето на жителите кои живеат покрај брегот.

Новозеландската премиерка Џасинда Ардерн рече дека планирањето е веќе во тек. Планирањето вклучува проценка на трошоците и буџетите за преселување на жителите од потенцијално ранливите области и градежната инфраструктура.

Ардерн ги повика Новозеланѓаните да направат се што е можно за да ги намалат емисиите и да ги ограничат последиците од климатските промени. Зголемувањето на нивото на морето е резултат на затоплувањето и проширувањето на океаните, како и на топењето на глечерите.