Бугарија воведе нов модел на наплата на патарини базиран на CO2 емисиите

Во Бугарија, од овој месец на сила стапија измени во системот на наплата на патарини. Имено, во пресметката на износот на патарината за возилата со маса над 3,5 тони, e вклучена и класификацијата според количината на емисии на јаглерод диоксид (CO2). Промената е дел од обврските кои произлегуваат од ЕУ регулативата, односно Директивата (EU) 2022/362, со која се предвидува постепена примена на CO2 класификацијата во сите земји членки.

За користење на калкулаторот за определување на емисиите на CO2, потребно е да се отвори account преку e-mail адресата и да се внесат техничките податоци за возилото врз основа на информациите од сообраќајната дозвола, сертификатот за усогласеност или документ со информации за купувачот. Системот нуди и примери на документи со цел правилно да се внесат податоците.

Возилата кои за прв пат се регистрирани пред 01.07.2019 година, автоматски се вбројуваат во CO2 класа 1 и за нив не е потребна дополнителна регистрација. Возилата кои се регистрирани после тој датум, и имаат мотори со внатрешно согорување, можат да бидат распределени во класи од 1 до 4, при што класификацијата во повисока класа важи шест години од првата регистрација. Електричните возила и возилата на водород спаѓаат во CO₂ класа 5, и тие ќе плаќаат најниски давачки.