Само во Лондон: Стан со широчина четири метри и цена од милион долари

Без оглед на пандемијата што го потресе целиот свет, се чини дека пазарот на недвижности во Лондон цвета…

Доказ за ова тврдење е ултра тенкиот имот во Кенсингтон, кој е широк само 3,96 метри, а се наоѓа во една од најтесните згради во Лондон и е мошне популарен. И покрај својот „слим“ ентериер, овој дом крие две спални соби и две бањи.

Малиот стан се простира на површина од 53 квадратни метри и има бели ѕидови, две бањи, паметни вградени елементи и кујна која се карактеризира со сјајно бели плочки. Згора на тоа, главниот простор за живеење е свртен кон југ, што значи дека ужива максимално количество светлина во текот на целиот ден.

Исто така, овој дом содржи и тераса која е доволна за мал сет за седење и само неколку растенија. Според агентите за недвижности кои работат на продажбата на овој стан, неговите сопственици за фантастична сума од еден милион долари, ќе добијат единствена можност да живеат во добро позната локална туристичка атракција. Дали е навистина позитивно или не, одлучете сами.

Овој дом првично бил уметничко студио, преживеал уривање на останатите градби во околината за време на изградбата на метрото кон крајот на деветнаесеттиот век. Тогашната влада на оваа локација ја запрела изградбата на влезот во метрото, па така овој стан останал недопрен.

Во официјалниот опис пишува: „Прекрасен стан со две спални соби и две бањи во поранешно уметничко студио, сместено на еден од најубавите плоштади во Кенсингтон и Челзи, со тераса свртена кон југ. Овој стан е идеално позициониран за сите љубители на шопинг, ресторани и кафулиња, со одлични врски со јавниот превоз“.

Ако сакате мали домови со вклучен луксуз, овој е за вас!