Новиот изглед на реновираниот студентски дом „Гоце Делчев“

Некогаш еден од најубавите студентски домови во нашата земја, студентскиот дом „Гоце Делчев“ во Скопје со години наназад полека се распаѓаше поради негрижа и недоволна посветеност за негово одржување.

Студентите кои што престојуваа во просториите на студентскиот дом беа соочени со мизерни услови на живеење, меѓутоа Министерството за образование и наука покрена постапка за негово реновирање. За сега завршен е проектот за реконструкција и санација на блокот „Б“ каде што променети се старите прозорци, парното греење и лифтовите, се монтира нов функционален мебел кој ќе ги задоволи потребите на студентите, нови санитарии и поставен е безжичен интернет. Се очекува во нареднот период да се распише конкурс за реконструкција на блокот „А“, а подоцна и за блоковите „В“ и „Г“.

,,Мора да се има во предвид фактот дека неопходно е да постои добра организација и паралелно со градежните активности и сместувањето на студентите заради капацитетите. Ние можеме и да го затвориме целиот студентски дом, меѓутоа во тој случај повеќе од 1.300 студенти ќе останат без можност да бидат сместени. Затоа мораме да одиме етапно и со сместување и со реконструирање”, истакна Ристоски.

Целосната реставрација на студентскиот дом се очекува да биде завршена кон крајот на 2016 година или почетокот на 2017 година.