Не е одлучено како ќе се урива зградата до кафулето „Корзо“!

Ќе се прави проект за проширување на улицата „Даме Груев“, иако уште не е одлучено како ќе се урива зградата до кафулето „Корзо“, информира „Вест“.

Град Скопје распиша тендер за изработка на проект за улицата на потегот од крстосницата кај ТЦ „Палома бјанка“ до раскрсницата кај паркот „Жена борец“.

Според најавите од Градот, улицата треба да стане булевар со четири сообраќајни ленти, по две во двете насоки.
За уривање на зградата до кафулето „Корзо“ постојат две варијанти.

Првата предвидува да се урнат само приземјето и првиот кат, и со потпорни ѕидови да се зацврсти објектот, а втората да се отстранат сите четири ката.
Конечната одлука треба да ја даде ИЗИИС, откако ќе утврди колку е цврста градбата.

Иако Градот уште нема одлучено како ќе се урива зградата, мината година беше донесена одлука за размена на деловен простор со фирмата „Центро“ АД Скопје во стечај. За деловниот простор во приземјето каде што некогаш беше „Рубин кармин“ и првиот кат, „Центро“ ќе добие деловен простор во катната гаража „Тодор Александров“, која се наоѓа отспротива.