Најуспешно дело во областа станбена архитектура во Хрватска за 2019

Склоп од четири куќи во станбената населба Дикло во Задар, проект на архитектите Ива Летиловиќ и Игор Педишиќ „4 куќи за 4 брата“ е добитник на наградата „Драго Галиќ“ за најуспешно остварување  во сферата на станбената архитектура во Хрватска за 2019. година.

Четирите куќи проектирани се за четири брата. Тие сочинуваат низа, од морето до возвишувањето, а редоследот на нивните сопственици строго ја следи фамилијарната хиерархија. „Секој од нив бараше одредена структура на апартманите за изнајмување, како и голема станбена единица, програмски и функционално прилагодена на потребите на своето семејство“, истакнуваат архитектите.

Проектот ја реинтерпретира, онаа речиси архетипската, хибридна типологија која се состои од просторот за живеење на сопственикот, најчесто во приземјето, и неколку станови за изнајмување горе, а која со децении упорно го уништувала јадранскиот брег. „И сето тоа во срцето на предградијата, создадено токму со стихијно мултиплицирање на на истата типологија“, велат архитектите.

Секоја структура е пространа и програмска композиција на мала семејна куќа  и исечок на некој мегахотел. Многу читливо е поделена на два контрастни волумена: станбен и туристички. Вториот генерички е анонимен, ги користи обликовните елементи на туристичката типологија, а воедно е поставен да формира подножје, но и подлога на другиот волумен, станбената единица.

Станбената единица е засебен волумен, со типолошки карактеристики на семејна куќа, која не стои на тлото, туку е изградена на веќе постоечки волумен, постамент и се протега низ три нивоа: од влезната палуба на првиот кат до наткриената кровна тераса на третиот кат. „Празнината која ги нагласува овие два волумена е палубата со базенот, единствено место на контакт на постојаните и повремените станари“, велат архитектите.

Сите четири станбени единици структурирани се со повторување на истиот модул, кој потоа се модифицира и во основа и во пресек, во зависност од специфичните потреби на станарите.