Ќе се собира селектирана пластика од домовите во Лисиче

„Ја собираме пластиката од дома“ е проектот што почна да се реализира во населбата Лисиче, а кој има за цел да собира селектирана пластика од околу 300 семејства.

Неформални собирачи ќе ја подигнуваат пластиката директно од домовите на жителите од оваа населба, кои во месец август преку потпишување договор се согласија да селектираат тврда пластика и ПЕТ амбалажа.

Оваа акција има двојна цел – од една страна да се подобри управувањето со отпад во Општина Аеродром и на тој начин да се заштити животната средина, а од друга страна да се развијат здрави навики кај жителите и во исто време да се овозможи економска инклузија на онаа ранлива категорија граѓани, кои неорганизирано собираат пластика.

Проектот го имплементира еколошкото здружение „Гоу грин“ и ромскиот „Бизнис информативен центар“ со активна поддршка на Општина Аеродром и финансиска помош од Градот Скопје.