Кинетички столици инспирирани од природата

Carlo Ratti е познат италијански дизајнер, но, исто така, и професор на престижниот американски МИТ. Кога суптилната италијанска естетика ќе се спои со желбата за технолошки напредок и истражување на непознатото, можеме да очекуваме дека резултатот ќе биде многу интересен.

Токму така се направени столиците од линијата Swish, кои дизајнерот ги презентирал во рамките на овогодишната Миланска недела на дизајнот.

Тие се направени од дрво и со истенчен минималистички дизајн, но она што ги издвојува од сличните производи е концептот што се крие зад нив. Имено, дизајнерот ја проучувал кинетиката што ја наоѓаме во природата, во движењето и изгледот на животните како што се пауните, и посакал да ги искористи во дизајнот на мебел. Така, столиците Swish можат да се комбинираат на разни начини, создавајќи различни форми и нудејќи различни цели.