Први фотографии од градилиштето на оперската куќа на Snøhettа во Јужна Кореја

Нарачана во 2012 година на меѓународен конкурс, Оперската куќа во Пусан на Snøhettа моментално е во изградба на брегот на Северното пристаниште во градот. Завршувањето на главните работи е планирано за крајот на 2026 година, додека отворањето е закажано за 2027 година.

Замислена како прва оперска куќа во вториот по големина град во Јужна Кореја, објектот од 48.000 квадратни метри го редефинира традиционалниот поим за оперска куќа, претставувајќи ја како отворена и инклузивна јавна институција.

Наместо да функционира исклучиво како простор за изведби, зградата е замислена како јавна дестинација што поттикнува секојдневна употреба, колективно искуство и долгорочно културно ангажирање во рамките на урбаната трансформација на Пусан.

Со локација на терен насипан со земја, оперската куќа игра клучна улога во трансформацијата на поранешното индустриско крајбрежје во достапен и активен јавен простор.

Објектот со површина од 48.000 квадратни метри интегрира изведувачки простори со плоштади, шеталишта и јавно достапен покрив, дополнително зајакнувајќи ги врските помеѓу градот, паркот и морето.

Програмската структура вклучува главна сала со 1.800 седишта, повеќенаменска сала со 300 седишта, простори за проби, како и бројни јавни содржини.

Континуиран архитектонски гест

Објектот има неколку влезови, и од градската страна и од крајбрежната страна, и на тој начин зградата се воспоставува како континуиран архитектонски гест, чие јавно присуство се протега надвор од ентериерот, во околниот пејзаж.

Архитектонскиот концепт е дефиниран преку две спротивставени, континуирани површини кои ја обликуваат геометријата на зградата. Долната, лачно обликувана рамнина ја поврзува зградата со теренот, создавајќи врска помеѓу градот и морето, додека горната рамнина се отвора кон небото.

Комплексната двослојна закривена форма на објектот проектирана е со помош на параметарски дигитални алатки, кои овозможуваат прецизна координација на архитектурата и конструктивните елементи и закривените фасадни панели.

Како што објаснува архитектонското биро Snohetta, Оперската куќа во Пусан е создадена во напнатост помеѓу овие два елементи, на местото каде што се среќаваат копното и водата.

Четирите шпица на зградата се протегаат кон пристаништето, дополнително нагласувајќи го нејзиниот поморски контекст, додека два дијагонално подигнати агли ги означуваат главните јавни влезови и ги насочуваат посетителите преку флуиден систем на движење околу објектот.

Во приземјето, оперската куќа е обмислена како отворен и пропустлив јавен простор. Јавна променада се обвиткува околу зградата и ја поврзува со околните плоштади, додека главното фоаје се протега долж две страни на објектот, ориентирајќи ги внатрешните простори кон брегот.

Ова ниво вклучува клучни јавни функции, вклучувајќи го главното фоаје, ресторанот и пристапот до партерот, замаглувајќи ја линијата помеѓу ентериерот и екстериерот.

Ваквата организација поттикнува транспарентност и пристапност, дозволувајќи зградата да функционира како дел од јавен простор дури и вон времето на претставите.

Панели од полно дрво од цреша

Во самото срце на проектот е главната оперска сала, проектирана како прецизно калибриран акустичен простор, чија форма и материјализација се внимателно обмислени за да поддржат изведби од светска класа.

Панели од полно дрво од цреша го обликуваат ентериерот и ја подобруваат резонанцата, топлината и јасноста на звукот.

Над просторот на салата, благо наклонетите комуникации ги водат посетителите до проодниот кровен пејзаж, замислен да функционира како второ јавно ниво.