Заштитете ги розите пред зимата

Кога есента ќе ја обои градината и утрата ќе станат постудени, време е да им помогнете на розите да ги преживеат зимските месеци. Иако може да изгледаат нежно, овие кралици во градината можат да ги преживеат дури и најстудените денови – но само ако им се пружи соодветна нега.

Првиот чекор е да престанете да додавате ѓубриво и вода на розите во големи количини. Така растението природно ќе го забави растот и ќе почне да се подготвува за мирување.

Кастрењето на розите пред зимата се прави дури кога растението ќе влезе во фаза на мирување, обично кон крајот на октомври или ноември, но пред силни мразови. Тогаш се кастреат само оштетените, сувите и заболените гранки, како и оние што се вкрстуваат и ја згуснуваат грмушката. Целта не е да се формира форма, туку да се спречи гниење и да се заштити од кршење под снегот. Гранките се скратуваат на висина од околу 30 до 40 сантиметри, во зависност од сортата, а сечењето треба да биде дијагонално и над пупката што е свртена кон надвор.

По кастрењето, околу стеблото треба да се насипа слој почва висок 20-30 сантиметри, кој го штити коренот од замрзнување. Врз ова се додава малч, суви лисја или компост, а во постудените региони, слој од слама или зимзелени гранки. Стеблата од роза може дополнително да се завиткаат со јута или агротекстил, додека розите во саксии се носат во заклонето место, покрај ѕид или во ладна просторија. Напролет, кога почвата ќе се затопли и опасноста од мраз ќе помине, зимските слоеви на заштита треба внимателно да се отстранат, а потоа следи главното пролетно кастрење, кое го формира растението и го стимулира цветањето.

Ако сè е направено на време и со мерка, розите ќе ве наградат во мај со прекрасни пупки и мирис што го означува вистинското враќање на пролетта.