„Валцер на реморкери“: Бродови што танцуваат во срцето на Санкт Петербург (ВИДЕО)

Замислете танц, но не на подиум, туку на река, и не во изведба на балерини, туку од гигантски челични реморкери, кои во совршен ритам се вртат, лизгаат и прскаат вода среде Санкт Петербург. Секое движење на овие пловечки џинови е симфонија на сила и прецизност, диригирана од раката на капетанот кој намето палка држи кормило.

Од 1 до 4 мај, бреговите на Нева стануваат место на средба на традицијата, инженерската генијалност и уметничкиот израз. Овој настан не е само празник за очите, туку и прослава на поморската традиција и технолошкото наследство на Русија, кое се негува повеќе од една деценија и кое привлекува сè поголем број посетители секоја година.

„Валцер на реморкери“ е еден од најинтересните пролетни настани

По единаесетти пат по ред, северната престолнина на Русија е домаќин на необичен настан во кој учествуваат реморкери. Како дел од настани на реката Нева, капетаните на овие гигантски бродови ја демонстрираат својата вештина во управувањето со овие водни чудовишта, што бара не само исклучителна концентрација, туку и стабилна рака и смирен ум.

Овој настан традиционално предизвикува голем интерес, како кај жителите на Санкт Петербург, така и кај туристите, кои избираат да го посетат овој град за време на мајските празници. Возбудата е дополнително зголемена од млазовите вода што се расфрлаат врз публиката, а ги изфрлаат реморкерите. Покрај тоа, на бреговите на Нева беа организирани и други забавни настани.

Забавната програма вклучува низа активности: уметнички работилници, интерактивна „Морнаричка школа“, играње на играта „Потонување на подморници“, тематски квизови и слично, а писателите на поезија посветена на море, бродови и поморство имаат можност да ги презентираат своите дела пред голем број посетители.

Фестивал на ледокршачи – четири дена забава

Настанот „Валцер на реморкери“ е само врвот – фестивалот на ледокршачи трае цели четири дена, од 1 до 4 мај. На првиот ден од фестивалот, ледокршачите пристигнуваат во пристаништето, ги пречекува дувачки оркестар, во чиј настап можете да чуете стари маршеви во ново руво.

На вториот ден од фестивалот се организираат екскурзии, за време на кои посетителите можат да посетат ледокршачи и реморкери, да се запознаат со нивниот начин на работа и други интересни работи. Третиот ден е секогаш посветен на „Валцер на реморкери“, кој сега е заштитен знак на целиот фестивал и настанот што убедливо привлекува најголемо внимание.