Современа куќа од слама во Загорје

Хрватското архитектонско студио Proarh изврши реновирање на куќа која оддава почит на традицијата на хрватскиот регион Загорје, користејќи локални материјали.

Старата селска куќа во Загорје е реновирана со комбинирање на модерни архитектонски елементи и оригинални карактеристики на планинските колиби, типични за традиционалната архитектура на областа.

За време на реновирањето користен е локален материјал, слама, како и услуги на мајстори од околните села кои куќата ја обновиле во согласност со правилата на традиционалните занаети.

Куќата, која се простира на три етажи (подрум, приземје и кат), на јужниот дел е изведена во стакло, низ коешто од внатрешноста се нуди прекрасен поглед на околната природа. Преку стаклените врати се излегува на пространа тераса, која се надвиснува над падината.

Специфичноста на објектот е користењето на слама, како на покривот така и на ѕидовите. Сламата е всушност архаичен и подзаборавен градежен материјал во овој регион, кој во минатото за исти цели многу се користел, пишува Designboom.

Бродскиот под кој е користен во внатрешноста продолжува и на терасата на објектот, и на тој начин, уште еднаш ги поврзува внатрешноста и надворешноста, односно ја отвора куќата кон околната природа.