Оваа колекција на столчиња овозможува неправилни начини на седење

Парче мебел што потекнува од реалниот живот. Овој пат фокусот е на седењето и сите оние лоши навики и пози што повеќето од нас ги практикуваат секој ден.

Колекцијата столици Bad Posture Chairs (Столици за неправилно држење на телото), потпишана од Mara Bragagnolo, тргнува од едноставна идеја дека не седиме сите на ист начин.

Ова е особено применливо за примерите на работа од дома кои станаа пораспространети по пандемијата, каде што повеќето луѓе го поминуваат работното време во разни неконвенционални седечки положби.

Наместо мебелот да го „учи“ телото како правилно да седи, овие столчиња го прават спротивното. Тие се дизајнирани да поддржат спонтани, честопати неправилни положби – седење со прекрстени нозе, потпирање на страна, скрстување на едната нога или постојано менување на положбите.

Реалноста како основа на дизајнот

Она што го прави овој проект интересен и за пошироката публика е фактот дека препознава нешто многу секојдневно – повеќето луѓе не седат правилно.

Ова особено се однесува на луѓе на кои им се потребни почести промени на положбата, вклучувајќи ги и невродивергентните корисници, за кои стандардните столчиња честопати не обезбедуваат соодветна подршка.

Затоа, авторката не се обидува да го корегира корисникот, туку да се прилагоди на него. Конструкцијата на секоја столица е осмислена врз основа на конкретни, повторувачки движења на телото, така што дизајнот е таков што однапред ги предвидува.

Преиспитување на комфорот

Претставена на неодамна завршениот Salone del Mobile во Милано, колекцијата е изработена од тонирана брезова иверица и е создадена во соработка со Valter Cagna и Tommaso Braceschi, но нејзиното значење не е само во материјалот или формата.

Инспирацијата доаѓа од делата на Bruno Munari, кој уште во средината на 20 век преку своите експерименти доведувал во прашање што всушност значи „удобно“.

Во тој дух, колекцијата Bad Posture Chairs балансира помеѓу критиките и играта, потсетувајќи нè дека удобноста не е универзална категорија.

Дали проблемот е во нас… или во столчињата?

Овој проект отвара интересно прашање кое оди подалеку од самиот дизајн – дали нашите навики се навистина лоши или стандардите се едноставно премногу ригидни?