Отворена изложбата „40 години Траги во просторот“ на архитектот Билјана Филиповска

Вчера во Музејот на град Скопје, отворена беше изложбата „40 години Траги во просторот“ посветена на архитектонското творештво на архитектот Билјана Филиповска.

На отворањето на изложбата на којашто беа присутни бројни колеги, архитекти, деловни патнери и пријатели, се обратија Љубен Тевдовски, директор на музејот на град Скопје, Сања Раѓеновиќ Јовановиќ, претседател на ААМ, проф.д-р Калиопа Димитровска Ендрујс од Љубљана и самата авторка Билјана Филиповска.

Изложбата претставува ретроспективен пресек на архитектонското и дизајнерско творештво на архитектот Билјана Филиповска.

Во изминатите 40 години нејзиното творештво брои голем број проекти, од кои 30-тина се позначајни, а повеќето од нив се и реализирани.

На изложбата, преку дизајнирани паноа, беше презентиран одбир на најзначајни проекти и реализирани објекти со кои Билјана Филиповска, самостојно, или со соработници во тим, оставила значаен белег на македонската архитектонска сцена.