Порта3 – градежништво, архитектура и екологија Порта3 – градежништво, архитектура и екологија
Утре (1 септември) во организација на Граѓанската иницијатива Охрид ЅОЅ, ЗУМД ТАКТ и Здружението за заштита на животните и животната средина ЕДЕН, поддржани преку програмата Цивика мобилитас, Фондацијата Хајнрих Бел и Global Greengrants Fund, ќе биде организиран еко-хепенинг во паркот пред хотелот Палас во центарот на Охрид.
Креативниот перформанс во 19:30 ч. ќе го почнат неколку циркуски артисти на кои ќе им се придружат статисти и со соодветна кореографија ќе ја раскажат приказната на трската. Истовремено, на видеобимот ќе се прикажува соодветна и селектирана 15-минутна програма. Перформансот завршува со наратор и краток триминутен еко-филм.
Целта на овој настан е да се влијае на еколошката свест, особено кај младите, но и сите да се потсетиме на исклучителните природни вредности на Охридското Езеро.
Според организаторите, перформансот е воедно и најава за почетокот на новата сезона за Охрид. „Туристичката сезона во регион со исклучителни и светски признати природни вредности не смее да трае еден месец! На регионот му е неопходен целогодишен еко-туризам! Неопходни му се помалку туристи кои се спремни да платат повеќе! Регионот е целосно несоодветен за евтин масовен туризам и затоа таквите пакети мора што побрзо да се исклучат од понудата!“, се вели во соопштението од страна на организаторите.
Специјално за настанот ќе бидат изработени маици со еко-пораки, како и картички од садлива хартија. Маиците ќе се разменуваат за донација од 300 мкд кои целосно ќе се искористат за активностите на Граѓанската иницијатива Охрид ЅОЅ. Со секоја донација за маица граѓаните ќе добиваат бесплатно картичка од садлива хартија.
Дојдете да се забавуваме и заедно да учиме како да бидеме активни граѓани!
Организатори на настанот се: Граѓанската иницијатива Охрид ЅОЅ, ЗУМД ТАКТ и Здружението за заштита на животните и животната средина ЕДЕН, поддржани преку програмата Цивика мобилитас, Фондацијата Хајнрих Бел и Global Greengrants Fund.
