ЕУ сака да ги поедностави правилата за енергетски ефикасните производи

Европската Комисија објави четиринеделен повик за доставување на мислења за правилата на ЕУ кои се однесуваат на енергетската ефикасност за широк спектар на производи. Целта е да се соберат информации од производителите, трговците, надзорните тела и потрошувачи, кои ќе и помогнат на Комисијата во подготовка на предлогот за поедноставување на актуелното законодавство.

Во фокусот се постоечките правила, посебно Рамковната уредба за енергетско означување (EU/2017/1369) и Уредбата за означување на пневматици (EU/2020/740). Комисијата сака да ги намали администратвните трошоци за компаниите и да го олесни почитувањето на правилата, а истовремено да ја зачува ефикасноста на законодавството и рамката која неодамна е воспоставена со Уредбата за екодизајн на одржливи производи (EU/2024/1781). Повикот завршува на 12.03.2026 година.

Комисијата посебно бара предлози за тоа како да се направи поедноставна и поефикасна проверката на усогласеноста. Според последните податоци, во просек 83% од потрошувачите на ЕУ ја проверува енергетската ознака при купување на производи, што покажува високо ниво на доверба во означувањето. Комисијата сака да ја задржи таа доверба и кога ќе се поедностават правилата.