Државите од Медитеранот ја зајакнуваат соработката во областа на енергетиката

Неформалната група од девет медитерански држави членки на ЕУ (MED9) се состанала во Хрватска со цел да разговара за зајакнување на енергетската сигурност, отпорноста на енергетските системи и конкурентноста на европската економија во услови на енергетска транзиција. Покрај Хрватска во својство на домаќин, на настанот учествувале Кипар, Франција, Грција, Италија, Малта, Португалија, Словенија и Шпанија, како и претставници од Европската Комисија.

Состанокот бил фокусиран на зајакнување на регионалната соработка, развој на стратешката енергетска инфрастрктура, сигурноста во снабдувањето и технолошката неутралност како едно од клучните начела на европската енергетска транзиција. Учесниците на состанокот укажале на потребата од подобро усогласување на европските регулаторни и финансиски механизми со специфичностите на енергетските системи на медитеранските земји, посебно во делот кој се однесува на вложувањата во електроенергетските мрежи, складишните капацитети, флексибилноста на системите и заштитата на критичната инфраструктура. По завршувањето на состанокот усвоен е заеднички документ со кој е потврдена определеноста на државите за зајакнување на енергетската сигурност, диверзификација на изворите на снабдување, развој на прекуграничната инфраструктура и спроведување на конкурентна чиста енергетска транзиција. Во документот посебно е нагласена важноста на отпорноста на енергетските системи, понатамошните вложувања во инфраструктурата и поинтензивна координација на државите од MED9 во креирањето на енергетската политика на ЕУ.