Драма во Њујорк: Зграда евакуирана по деформација на носечките челични столбови

Деловна зграда од 38 ката во изградба во центарот на Менхетен беше евакуирана во понеделникот откако се деформирале носечките челични столбови, што предизвикало слегнување на повеќе катови и уривање на градежните материјали, соопштија властите на Њујорк.

Зградата била евакуирана околу 8:11 часот по локално време откако градежните работници забележале дека два носечки столба на 21. и 22. кат почнале да попуштаат, соопштија Полициската управа на Њујорк (NYPD) и Противпожарната служба на Њујорк (FDNY).

Пожарникарите изјавија дека дошло до деформирање на конструкцијата помеѓу 21. и 26. кат, пишува „Њујорк пост“, додавајќи дека причината за оштетувањето засега не е позната.

Сите градежни работници безбедно ја напуштиле зградата, а во инцидентот немало повредени.

Градоначалникот на Њујорк, Зохран Мамдани, изјави дека досегашните наоди укажале на постоење на сериозни конструктивни проблеми во објектот.

„Она што досега е утврдено е дека има конструктивни проблеми на зградата. Ги повикувам граѓаните кои се во непосредна близина да ги следат упатствата на надлежните служби. Не само оваа зграда, туку и околните згради, вклучувајќи го и блиското училиште, беа евакуирани и верувам дека овие мерки се оправдани во овој момент“, рече Мамдани.