Порта3 – градежништво, архитектура и екологија Порта3 – градежништво, архитектура и екологија
Ако постои некој моден бренд од кој очекуваме да ги помести границите на дизајнот на модните писти на машките модни ревии, тоа е францускиот гигант Louis Vuitton. Париз летово доби заслужено разладување во форма на огромен воден бран кој носи и важна еколошка порака.
На ревијата на машката колекција Louis Vuitton за пролет/лето 2027 година, покрај облека, вниманието го привлече и спектакуларната сценографија што го претвори просторот на Cité Internationale Universitaire de Paris во брег во сред градот.
Централниот елемент на пистата е монументален воден бран висок околу осум метри и широк повеќе од 37 метри, низ кој водата континуирано тече, создавајќи впечаток на замрзнат момент непосредно пред бранот да се удри на брегот.
Модна писта како привремена плажа
Наместо класична модна писта, гостите затекнале отворен простор покриен со фин песок, дрвена патека налик на оние што водат до плажа и голем воден ѕид што благо ја разладувал публиката за време на топлата вечер во Париз, погоден од високи температури.
Сценографијата е осмислена да ја следи темата на самата колекција, инспирирана од културата на сурферите и заедниците што живеат покрај океан.
Имало место и за автобус од плексиглас во кој е изложен дел од колекцијата.
Плажата е претставена како место за средби, патувања, слобода и припадност, што природно се надоврзува на ДНК-ато на модната куќа Louis Vuitton, која од почеткот е поврзана со идејата за патување.
Спектакл со еколошка порака
Иако ваквите модни сценографии лесно можат да делуваат како чиста демонстрација на моќ и буџет, овој пат Louis Vuitton инсистирал и на поодржлив пристап.
Водата што се користела за инсталацијата е обезбедена преку Eau de Paris, јавно претпријатие што управува со градската водоводна мрежа – циркулирала низ затворен систем, а по ревијата е вратена во градскиот систем.
Песокот што го покривал просторот нема да се фрла, туку ќе биде дониран за терени за одбојка на плажа на кампусот Cité Internationale Universitaire de Paris, а дрвените клупи за седење се исто така повторно употребени од претходна ревија.
Креативен бран
Откако го презеде креативното водство на машката линија на Louis Vuittona, Рharrell Williams покажува дека ја гледа модната ревија како комплетно искуство.
По монтажната куќа Drophouse, а која тој ја дизајнираше во соработка со јапонската компанија Not a Hotel, сега вниманието го привлече огромен воден бран.
Во двата случаи, сценографијата отвора поширока приказна за начинот на живот, патувањата, природата, иднината на дизајнот и функционира и надвор од контекстот на модата – како момент во кој модата, дизајнот, привремената архитектура и еколошката свест се среќаваат во еден огромен, освежителен бран.
