Божиќно село Трикала: Од фабрика за леб до фабрика за желби

Старата зграда од тули, изградена во 1884 година која била фабрика за производство на леб сега има друга намена. Истата зграда, сега само завиткана со црвена панделка е место каде се кажуваат божиќните и новогодишните желби. Зградата која се наоѓа во Божиќното село во грчкиот град Трикала е атракција како за младите така и за повозрасните посетители.

Индустриските објекти од 19 век, изѕидани со тули, се многу атрактивен простор насекаде во светот и се претвораат во конгресни центри, галерии, дискотеки, дури и бизнис-центри и објекти за други намени. Оваа мелница е претворена во детска желба.

Во објектот со помош на џуџињата децата може да ја научат уметноста на правење леб. Во внатрешноста на зградата за печење, децата имаат можност да присуствуваат на практична работилница за леб. Тие обезбедуваат основни состојки како брашно, сусам и кисело тесто за да се обликува, дизајнира и декорира лебот пред да се пече. Има и разни други божиќни кулинарски креации во кои може да се ужива.

Оваа магија, заедно со прекрасните приказни за самовили, џуџиња, гоблини и оревокршачи кои се трансформираат во убави момчиња на Бадник, стануваат реалност во Божиќното село во Грција.

Градот во Грција, кој 10 месеци во годината е само попатна станица кон метеорските манастири како светска атракција, во декември и јануари е вистинско сврталиште за туристите и во градот не може да се најде сместување бидејќи хотелите се резервирани два до три месеци однапред. Во Трикала, во последните десет години е поставено волшебно село од каде младите и старите посетители ги носат можеби најубавите божиќни спомени.

Мелницата на џуџињата има нов живот од детските бајки и сега е симбол на градот која нуди фантастично искуство, кое добива убав, едукативен карактер кој ги надминува традиционалните божиќни активности.

Во прекрасните замоци на селото ќе сретнете храбри витези и разиграни џуџиња, Дедо Мраз, но и магичен бунар што ќе ги „слуша“ вашите желби.

Исто така, може да се посети и фабриката за чоколади каде саканиот Дедо Мраз и неговите безброј асистенти ги откриваат своите слатки тајни, а највпечатливите колачи се прават во работилницата за чоколади.

Џуџињата ги обликуваат топлите и шарени бонбони создавајќи уникатни дизајни. Тие користат фантастични состојки (какао, јаткасти плодови, овошје, билки итн.) за производство и продажба на огромни чоколадни табли.

Секој агол од паркот крие различно изненадување. Бонбоните, крофните и колачите ја комплетираат сложувалката на слатките задоволства во оваа област од паркот.

Старите оџаци во паркот шират неверојатно примамливи мириси, апаратите за слатки се подготвени да изградат што повеќе играчки и бонбони, а разните тематски куќи, како домот на Дедо Мраз, куќата на Самовилата и магичните улички, чекаат деца од сите возрасти.

Дедо Мраз има своја куќа во паркот и ги отвора своите големи топли раце за стотиците илјади посетители. Младите и старите луѓе шетаат меѓу магичните улички од бајките и преминуваат преку реката и мостовите за да стигнат до вистинскиот остров, земјата на Дедо Мраз.

Таму ќе се најдете пред импресивниот влез на двокатната дрвена куќа со тераса од соништата со поглед на паркот. Внатре во куќата ќе ве пречека прекрасно уредена соба во која за момент ќе помислите дека сте дел од некој божиќен филм. Надвор од собата Дедо Мраз подготвен со санката чека да ги слушне новогодишните желби на посетителите.

Насекаде во паркот се наоѓаат интересни дрвени куќички во кои има убави, магични суштества кои ќе ве пречекаат во нивниот дом и ќе ги споделат своите тајни на љубов, радост и среќа.

Она што е вистински акцент е дека Божиќниот парк тематски е поделен на делови кои на младите посетители им нудат едукативни приказни кои ја подигнуваат свеста за клучни теми како што се важноста на водата, животната средина и љубовта со отворено срце во нашиот секојдневен живот.

Посетителите на Воденицата на џуџињата може да се нурнат и во игрите и возењата во луна паркот, да одат на лизгање на мраз во Белата палата, да купат сувенири и прекрасни подароци на божиќниот пазар, да вкусат разни задоволства во фабриката за чоколади.

Во овој парк Божиќ со себе ја носи магијата на која се надева секој од нас.