Мала пекара во Варшава што мириса на португалскиот брег

Во центарот на Варшава има мала пекара што мириса на португалскиот брег. Со својот ентериер и вкусови, Pastelowe ја пренесува атмосферата на сончево утро, бранови и морски ветрец директно во секојдневниот живот на градот.

Пекарницата Pastelowe oтворена е во варшавскиот кварт Солец – слатка оаза каде што португалските вкусови и сурферската естетика се спојуваат во простор што потсетува на далечни патувања. Специјалитетот на куќата, автентичниот „pastéis de nata“, не само што евоцира летни ритуали по должината на брегот на Лисабон, туку чувството на морето и сонцето се рефлектира во секој детаљ од ентериерот потпишан од студиото Znamy się.

Инспирација од брановите

Идејата за ентериерот произлегла од личното искуство на сопствениците, кои ја откриле својата страст за сурфање додека биле на одмор. Откако ја анализирале анатомијата на брановите, тие издвоиле три вида – „beach break “, „point break“ и „reef break“ – и ги преточиле во дизајнот на просторот.

Облите форми на клупите и огледалата симболизираат нежни и безбедни бранови, ритмички распоредените полици алудираат на нивната сила и униформност, додека динамичниот облик на пултот како тунел ја отсликува нивната енергија. Иако просторот е компактен, неговата организација поттикнува интеракција и ги поканува гостите да го истражат.

Португалскиот брег во срцето на дизајнот

Палетата на бои и материјали е внимателно избрана за да го евоцира чувството дека се наоѓате на португалскиот брег. Топлото дабово дрво потсетува на песочни плажи, додека сјајните површини од метал и фолија ја фаќаат светлината како морска пена.

Целиот таван е покриен со жолта пена во спреј со неправилна текстура, што дополнително го засилува впечатокот за сончев ден дури и кога надвор е облачно. Акцентите во длабоко морско сина боја, присутни во брендирањето и металните детали, му даваат на просторот потребната доза на контраст и свежина.

Мало бегство во голем сон

Pastelowe е повеќе од пекара – тоа е архитектонска нарација за океанските бранови, традицијата и соништата. Преку хармонијата на боите, текстурите и формите, овој простор нуди бегство од секојдневниот живот и нè води, барем за момент, директно до сончевиот португалски брег.