Во овој ресторан во Краснодар секој детаљ има значење

Проектанското биро SOIA Design го проектирало ентериерот на ресторанот „Мамули“ во Краснодар, Русија со јасна цел – да создаде простор што ја слави грузиската традиција, но без клишеата што често ги следат тематските ресторани.

Наместо буквално да ги копираат традиционалните мотиви, архитектите ги интерпретирале на современ начин, создавајќи ентериер што изгледа елегантно, автентично и сосема различно од сè што вообичаено може да се види.

Топлите тонови доминираат во просторот, додека ѕидовите третирани со декоративен малтер со златен сјај внесуваат чувство на топлина и дискретен луксуз.

Еден од највпечатливите детали се лустерите инспирирани од обликот на кошниците за пчели, кои висат над салата како уметнички скулптури. Наспроти нив се наоѓаат балустри чија форма наликува на зрна црн бибер – симбол на грузиската љубов кон зачините и богатата гастрономија.

Секое парче мебел е уникат

Речиси секој елемент од ентериерот е изработен по мерка. Дрвените облоги на столбовите со цик-цак мотиви, масите направени од исечоци од стебла, како и впечатливата маса со вграден камин, го трансформираат просторот во комбинација од ресторан, галерија и луксузна дневна соба.

Специјално дизајнираниот шанк и полиците дополнително го нагласуваат социјалниот карактер на просторот, додека осветлувањето функционира како уметничка инсталација што ја обликува атмосферата во текот на денот и вечерта.

Дизајн кој се прилагодува на секој настан

Покрај атрактивниот изглед, ентериерот е дизајниран да биде исклучително функционален. Различните места за седење овозможуваат интимни вечери, семејни собири или поголеми прослави.

Специјален простор е наменет за дегустации на грузиски вина и традиционални специјалитети, додека бината овозможува одржување концерти, културни настани и гастрономски презентации. За семејства со деца, постои специјално проектирана игрална, внимателно интегрирана во целокупниот концепт на ресторанот.

Дури и тоалетите се дизајнирани со иста грижа како и главниот простор, со што се заокружува единствената приказна за ресторанот каде што секој детаљ има свое значење.