Пејзажно уредување на индустриските објекти

Во денешно време, индустриските објекти не треба да претставуваат само простор за машини, прав, загадување и бучава. Тие може и треба да бидат попријатно место за работа и деловни состаноци. Имиџот и сопствената промоција секоја компанија го спроведува преку маркетинг, но исто така и хортикултурното уредување и одржување на сопственит двор во голема мера влијае на целокупната слика за сериозноста на компанијата.

Хортикултурното уредување и одржување на дворовите од индустриските објекти освен од декоративна страна имаат и практична страна, пред се во поглед на борба против загадувањето и бучавата. Ваквите објекти во суштина се категоризираат во две групи и тоа: прва група објекти од полесна индустрија каде што при преработка на репроматеријалите нема испуштање на штетни гасови и прашина, и втората категорија се фабрики кои емитуваат многу прашина, чад и штетни хемикалии. Примарната цел во дворовите од фабриките е да се насадат растенија кои најдобро би ја намалиле појавата на прашина, чад и бучава. Друга важна цел е да се обезбедат доволно позиции за сенка и свежина, така што вработените во одредени моменти од работниот ден ќе може да ги искористат. Покрај тоа, високите дрвја обезбедуваат значително намалување на температурите во погоните и канцелариите, со тоа што го спречуваат нивното директно загревање.

Во фабриките од тешката индустрија на поголеми површини се врши пошумување со брзорастежни видови како што се брези, каталпи, багреми, јавори и платани. Многу важно во уредувањето на објекти кои при својот производен процес во голема мера испуштаат штетни гасови при уредувањето да не се користат зимзелени видови.

Тука, пред се, се мисли на видови од родот на ели кои своите иглички ги менуваат на секои 8 до 12 години. Обично кога станува збор за индустриски комплекси се работи за површини и од неколку хектари, од кои и до 40 % се под зеленило. Кај ваквите површини тревниците завземаат најголем дел, а воедно тие го даваат основниот тон на целиот пејзаж. Затоа е многу важно тревниците редовно да се полеваат, да се искосени и прихранети. За таа цел, на големи површини за да се добие убав и негуван тревник во текот на целата вегетација, вклучително и во најжешките месеци, неопходно е поставување на систем за наводнување.

Дворовите од фабриките кои во својот круг имаат и административни објекти, покрај садењето на високи дрвја, може да се уредат и со алпинетуми, статуи, водени објекти и слично. Освен големите дрвја кои се садат пред се, од практична причина задолжително се користат декоративни грмушки и сезонско цвеќе. Секогаш најбогато уреден двор кај ваковите објекти е влезот, од причина што при посета на странки најважен е првиот впечаток. Како и кај многу други комерцијални објекти, влезот покрај убаво уредениот партер секогаш се збогатува со сезонско цвеќе, убаво оформени грмушки и редовно косени тревници што јасно ке ги води посетителите кон административниот објект.

Во Македонија за поздравување е се поголемата заинтересираност на комерцијалните и индустриските капацитети за вложување во почиста околина, со што директно инвестираат во поздрава иднина.

Како еден од позитивните примери е дворот на фабриката „Адинг“ која долги години наназад инвестира во здрава и еколошка средина. Со повеќе од 30% најразновидна зелена површина, компанијата заслужено има добиено повеќе награди и признанија од областа на екологијата – меѓу кои: наградата за најеколошка компанија – фирма со успешна примена на ISO 14001 и придонес за зачувување на животната средина во 2010 година и наградата за најдобро уреден двор на стопански објект во град Скопје во 2013 година. Од 2014 година компанијата има добиено А – интегрирана еколошка дозвола за усогласување со оперативен план издадена од Министерството за животна средина и просторно планирање на Р.Македонија.